Eggin í körfunni

Vitiði hvað hænurnar mínar 6 að tölu verpa allar í sama kassann? Þær hafa samt þrjá kassa um að velja en nota bara einn. 5 egg á dag að meðaltali er ekki sem verst. Hanarnir búa þeim gott heimili en ef menn vita það ekki þá eru það hanarnir sem halda heimilið. Taka til og kalla inn í matinn og hafa yfirsýnina. Galið í þeim er ekki svo galið. Venst og verður ómissandi, En hænurnar setja öll eggin í sömu körfuna.

evrópu symfonían og land míns föður...

Til að hægt sé að tala um fullveldi lýðveldisins þá þarf skýra sýn á hvað fullveldi er og hverning það er framkvæmt. Það er ekki sama fyrirbæri og 1918 eftir 2 heimstyrjaldir og heimskreppur. Stjórnarskrá Íslands er lítið breytt frá þeim tíma sem við vorum fullvalda undir dönsku kóngi. Forledrar mínir fæddust á þeim tíma fyrir lýðveldið. Afar og ömmur á undir danskri ríkisstjórn. Ég og börnin mín á lýðveldistímanum. Barnabarn mitt í andarslitrum sama lýðveldis?? Ef breyta þarf stjórnarskrá lýðveldisins þannig að hún geti samræmst nánu samstarfi við aðrar þjóðir verður að leggja þá vinnnu á sig.
Við erum til dæmis ekki þjóðveldi þó sumir kannska haldi það. Ísland er ekki bara fyrir "íslendinga" í skilningi ungmennafélaganna þegar kynþáttahreinsanir voru jafn sjálfsagðar og útrýming flámælis og málsjúkdóma einsog þágufallssýkinnar. Nútíma lýðveldi þarf forystu sem hefur sýn sem horfir jafnt fram sem aftur án kreddufestu og sjálfsupphafningar. Þessa forystu höfum við ekki og hún er ekki í sjónmáli. Þjóðrembingur má ekki byrja að grafa um sig sem stjórnmálaafl. Ekki nota ESB sem hinn mikla satan sem ógnar sjálfstæði okkar. Hin mikla ógn stafar frá okkur sjálfum.
Ég þarf náttúrulega ekki að útskýra það að Við Íslendingar erum okkur sjálfum verstir og höfum sögulega endað á "framfæri" annara mestan hluta af jarðsögu þjóðarinnar. Og ekki kenna útlendingum um það. Þetta er svosem staðdreynd sem hrokafullir leiðtogar síðustu áratuga hafa ekki áttað sig á.
Lýðveldi föður míns er ekki lengur það sem hann byggði upp. Kynslóð fremur illa menntaðra heimalninga (kynslóð mín) hefur jarðað það fyrirbæri. Nú verð ég frekar að hlusta á það sem börnin mín vilja kjósa sér og skoða þeirra sýn. Þau byggja hana á allt annari reynslu af erlendum þjóðum en núverandi ráðamenn. Það er synd að samfylkinginin sem hefur þó reynt að skapa sér sérstöðu með ESB aðild hefur ekki forystuafl til að setja þau mál á oddinn. Þau þola enga bið. Umræðan er svo þörf og svo margir hausar þurfa að rúlla út á meðan. Svo hef ég ekki heyrt að nokkurt ESB land hafi hingað til afsalað sér fullveldi sínu. Þau hafa meira að segja ekki staðið saman um ýmis stórmál. einmitt á sviði utanríkismála.
Þá telja andstæðingar ESB umræðunnar að allt sé að fara úr axlaböndunum og evrópa sé klofin upp að jöxlum. Þá er ágreiningurinn ekki talinn vera dæmi um að fullvalda þjóðríkisstjórnir takist á. Er ég þá ESB sinni? Nei ekki alveg. Hinsvegar er ég ekki ANDSTÆÐINGUR ESB.

10% Sjálfstæðisflokkur framtíðarinnar-aumingja sjálfstæðisflokkurinn II

Stór og gamall flokkur sem hefur fengið upp í fangið erfiðasta viðfangsefni íslandssögunnar. Forustusveit flokksins tók fjármalakerfið eitt skref fram á við á heilum áratug en á viku tvö skref tilbaka.

Tímabundið verður hann að éta ofan í sig "frjálshyggjuna" og verja þjóðnýtingu.

Sagan um ævintýralega frelsisgjöf "flokksins" þarf að umskrifa til að selja nýjan veruleika. Þeir "gáfu" okkur frelsi til athafna en við klúðruðum því. Þess vegna varð flokkurinn að leika Guð syndafallsins og taka aftur frá okkur "frelsið".

Alls ekki má sú saga komast á kreik að flokkurinn hafii verið á nokkurn hátt riðinn við helreiðina sem bankakerfið fékk. Þeir eru núna að bjarga málunum sem óreiðumennirnir komu okkur í.

Við erum ekki vitur eftir á því miður. Það var búið að spá þessum hrakförum lengi. Það var búið margoft að benda á lausnir en flokkurinn sá sér ekki hag í að hlusta, hugsa, né sjá neitt fyrir. Ætlaði bara að láta þetta ganga yfir sig "af því að ríkissjóður var svo vel stæður". "af því að við áttum vini í vestrænum lýðræðisríkjum"

og núna þegar það brást tárast þeir flokksmennirnir á lokaða fundinum sínum. Ekki vegna þess að áætlun þeirra hafi verið illa ígrunduð heldur af því að "vinirnir" í útlöndum brugðust. Pólitíkin var orðin svona einsog sætsúpa það þurfti bara að passa sig á því að hún væri ekki borin fram of heit.

Allt verður að gera til að komast hjá kosningum við núverandi skilyrði. Jafnvel verra eftir áramót þegar reiði almennings þarf að fá útrás á einhverjum. Það eru eflaust margir reiðir fyrrum sjálfstæðismenn núna að hugsa sitt.

Aðeins ein leið er fær fyrir flokkin núna sem ég veit ekki hvort þeir geta farið alveg strax: iðrunarleiðin, að biðjast afsökunar og bresta í grát opinberlega. Það myndi svínvirka. Við Íslendingar erum aumingjagóð þjóð ef á reynir. Hroki og valdsmennska er ekki í stöðunni núna. Auðmýktin fyrst.

Þegar tímar líða mun flokkurinn reyna að koma sínum mönnum í stjórnir bankanna. Á tímum kreppu og lausafjárskorts verður það aftur gæði að þekkja bankastjórann og kjósa rétt. Við sem erum eldri en fimmtug munum vel þessa tíma. Skyldi það vera sögulegt hlutverk flokksins að koma okkur aftur þangað?

Það að flokkurinn ætlar ævinlega að styðjast við úreltar hugmyndir útópíunnar verður geymt einsog leynd glóð. Velmegunardagar síðustu 10 ára verða glóðin sem blásið verður í þegar þeir orna sér með toddíið á síðvetrarkvöldum. 10% Sjálfstæðisflokkur framtíðarinnar.

Aumingja sjálfstæðisflokkurinn

Sálfstæðisflokkurinn er það stjórnmálasafn sem nú er gjaldþrota. Málefnalega hefur hann ekkert annað hlutverk en að hluta sundur og bjóða upp hugmyndir sínar í Kolaporti fyrrverandi hugsjóna. Frjálshyggjan verður fyrst til að fara á verði sem mun ekki koma þeim til valda eftir kosningar. Andstaða þeirra við evru og evrópusamstarf gerir flokkinn að Nýja Alþýðubandalaginu. Andstaða þeirra við opna og frjálsa umræðu hlýtur að verða þeirra bautasteinn.( les nú er ekki rétti tíminn til að ræða þessi mál). Í raun á Sjálfstæðisflokkurinn eftir að klofna varanlega. Minni flokkurinn verður byggður utanum leifarnar af "stefnu Davíðs" líkt og kommúnistarnir sem klöppuðu fyrir stefnu Stalíns í áratugi engum til gagns ogf varla til tjóns heldur þar sem þetta var svo vita áhrifalaust hjal. Það sem gerir Geiri Haarde fært um að sitja í stjórn í dag ( les hann stjórnar engu)er að enginn trúverðugur andstæðingur virðist á sjóndeildarhringnum.

skútan er sokkin

Bankamálin eru mikið rædd núna. Aðgerðir stjórnvalda hafa ýmist verið gagnslausar eða valdið meiri skaða. Svo við erum bara beðin um að horfa fram á veginn. Það muni rofa til. Auðvitað mun rofa til hvort sem er. Skaðinn er skeður. Við verðum líka að horfast í augu við það. Bara sárt að horfa upp á gagnslausa ríkisstjórn dag eftir dag. Samfylkingin er leiðtogalaus svo þar getur enginn tekið af skarið og velt þessari stjórn og tekið við. Sjálfstæðisflokkurinn er búinn að fá sitt tækifæri og klúðra því. Maður hlýtur að spyrja sig þegar farið verður í næstu kosningar hvort þessi krísa kenni mönnum að ríkisstjórn sjálfstæðrar þjóðar er ekkert teboð í Downingsstræti hjá vinum sínum. Er ekki fundur hjá Bush í Oval office að segja eitthvað nice við vini sína. Næsta ríkisstjórn mun fást við að berja í brestina sem þegar eru komnir og líka afleiðingar heimskreppu með viðeigandi verðfalli á hráefnisframleiðslu, minnkandi ferðamannastraumi og svo framvegis. Alvara lífsins.

Af hverju tala menn um að þessu hafi verið hægt að afstýra í október 2008 þegar menn hefðu átt aðgera sér það ljóst að afstýring gat orðið í síðasta lagi fyrir ári síðan en sennilega miklu fyrr. Stjórnendur bankanna vissu þetta örugglega.

Ríkisstjórnin var ónæm fyrir vísbendingum um að breyta þyrfti glæsilegri ímynd sinni sem ríkisstjórn framfara og frjálsræðis í bankaviðskiptum.

Seðlabankinn hefur verið óstarfhæfur vegna skorts á trúverðugleika frá því Davíð sté þar inn fyrir dyr. Mér dettur ekki í hug að þessir mætu menn sem þykjast stýra þjóðinni í þessum vanda núna séu vandanum vaxnir til að leysa nein mál nú fremur en endranær. Ég ætla ekki að standa að baki þeim ég er bara þvingaður í þá stöðu núna að vera áhorfandi.

utanríkisráðherrar íslands brillera ekki allir sem einn

að frátöldum Jóni Baldvini Hannibalssyni hafa ráðherrar utanríkis ekki skarað fram úr. Ingibjörg Sólrún fúngerar nákvæmlega einsog Dóri. Fúnksjóner í stórkallalegu geimi um EU og UN ekkert vantar hana nema stríðsyfirlýsingar fyrir hönd þjóðarinnar en það getur komið upp í hendurnar fyrr en varir. Hún fór að ráðum Bandaríkjastjórnar og lýsti yfir stuðningi við einhliða sjálfstæðisyfirlýsingu Kósóvó. Hér á Íslandi halda menn að þetta sé alveg pólítískt rétt. Málið er svo varasamt að bendla sig við að klókast hefði verið að láta sem ekkert sé eða mótmæla kröftulega. Ef þetta verður fordæmisgefandi megum við kyssa friðinn og stöðugleikann í Evrópu á afturendann. Af hverju í fjandanum þurfa ráðherrar utanríkis að vera svona algerlega úr tengslum við þjóð sína og þarfir samtíðar. Jón Baldvin hefði að mínu mati ekki farið út í þetta. Hann hafði pólitískt nef og gerði ekkert nema að það þjónaði Íslenskum hagsmunum að minnsta kosti líka. Þó prósjekt hans hafi verið nokkuð fífldjörf einsog krafa um Svalbarðasamning var það fullkomlega í tengslum við Íslenska "hagsmuni". Hann konsúlteraði ekki USA hvort Íslendingar ættu að lýsa yfir stuðningi við Litháen, sem var fífldjarft en í tengslum vð tímann og það beinum tengslum því hann gat hætt viðkvæmu m hagsmunum landans í samskiftum við Rússa sem þá voru reyndar á hnjánum tímabundið. Nú langar mig til að vita ef einhver getur frætt mig á því hvort hann studdi Nato stríðið í Júgóslavíu ég held ekki, það kom í hlut Dóra. Aftur ekki í tengslum við hagsmuni Íslands. Engu fórnað nema prinsippinu. Nato er ekki lengur það sama og það var. Þeir sem studdu inngönguna 1949 hefðu varla stutt Nato einsog það er starfrækt í dag. ég hef bara fengið jákvæða sýn á JBH eftir á. Skildi ekki að hann var einstakur í sinni deild og við fáum ekki aftur hans maka í embætti því miður. Utanríkisráðherrar Íslands eru einfaldlega ósigldir menn og konur. Menntun þeirra er takmörkuð og því er t.d. forseti Íslands ofjarl þeirra í raun. Hann er reyndar af svipuðu kalíberi og JBH þó þeir gætu aldrei unnið saman af persónulegum ástæðum frekar en vitsmunalegum.

Berin blána

Vorum í sveppaleit hjónin í Grímsnesinu. Fundum einhverja kúalubba, ekki sem verst. En meiri áhuga vakti með mér bláberin sem víða voru í klösum sem ég hef ekki séð jafn væna hér sunnanllands. Eftir viku verður hægt að tína þau og sulta. það grípur mann létt og ljúfsár stemming að finna að þessi dásamlega sumartíð endar áður maður áttar sig. Tímabilið eftir berjatínsluna hefur verið stutt yfir í að taka upp kartöflurnar og fyrstu næturfrostin. Á þessum árstíma er súldin betri en heiðríkjan.

Hænsnahöllin

Verkefni sumarsins var að byggja sér hænsnakofa í garðinum. Nú er hænsnahöllin risin og aðeins smávægilegt nostur eftir í smíðunum. 6 hænur komnar í hús og 2 hanar. Þetta er svakalega huggulegt dýralíf utan við eldhúsgluggan. Hanagalið á morgnana farið að verða ómissandi liður í morgunandaktinni. Af tilliti til nágranna fá þær blessaðar ekki að fara á fætur fyrr en eftir kl 8 á morgnana sem er mér finnst vera smá dýraplagerí en nauðsynlegt til að halda friðinn til lengdar. Þetta eru að sjálfsögðu íslendskar hænur af fornu kyni hver annari glæsilegri og hanarnir hrein unun á að horfa. Hænsnabúr án hana? Ekki að ræða það við mig. Hanar eru fyrirbæri sem við karlmenn mættum líta til sem fyrirmynd í mörgu tilliti. Litagleðin, áhuginn á hinu kyninu, söngþörfin, að byrja daginn spígsporandi. Mont er gott ef það er heilbrigt mont og komi af innilegri þörf vegna eigin verðleika einskonar speglun þess að maður sé fullkomlega í sátt við sjálfan sig og þar með heiinn allan. og svo gaggaallagúúú!!!

verðtrygging er það hugtak til nema á Íslandi ?

í dag varð ég komast á bloggið til að gera athugasemd við færslur annara um afnám verðtryggingar sem Gísli frændi minn bryddaði uppá. Nú er ég orðinn svo gamall að ég er eldri en verðtryggingin og hef alist upp með henni, upplifað og séð bæði úr nálægð lántakandans og fjarlægð þess sem hefur kynnst öðru fjármálaumhverfi. Ályktun mín er að þessu fyrirbæri beri að hafna og henda á safnhaug sögunnar sem fyrst. Fyrir þá sem enn eru í vafa býð ég upp á æfingu: útskýrðu "verðtryggingu" íslenska lánakerfisins fyrir venjulegum meginlandsborgara.

Bara hugtakið er illa smíðað og er ábyggilega ekki kennt sem slíkt í háskólum íslands. Vísitölubinding kemst næst því að vera skiljanlegt og er víst notað í þjóðhagfræði til að reyna að bera saman kaup og kjör mismunandi tímabila í sögunni. Á Íslandi nota menn þetta fræðilega viðmið skapandi til að breyta forsendum lánskjara lánveitanda í hag. Í því felst tryggingingin svokallaða. "Tryggingafélagið" er síðan lántakendur en þeir borga ekki bara út tjónið heldur líka iðgjaldið. Þeir sem eiga fé sitt tengt vísitölu eiga enga sérstaka samleið með lántakendum og geta kynt undir verðbólgu eða fellt gengi einsog þeim sýnist enda fá þeir alltaf sitt fé "bætt". Í vor heyrði maður talað um að ekki mætti hafa tvo gjaldmiðla í launum landsmanna. Þá myndi skapast Evru yfirstétt og krónu undirsátar. Verðtryggingin gerir í raun þetta og þykir bara fínt.

Það er athyglisvert að íslensku útrásar-fjármálasnillingarnir "okkar" hafa aldrei reynt svo vitað sé að selja öðrum þjóðum sem þeir hafa lagt undir iljar sér "verðtryggingu". Kannski hafa þeir gert æfinguna sem ég stakk upp á hér að ofan og séð að þetta er engin alþjóðleg söluvara þó hægt hafi verið að pranga henni yfir á íslenskan almúga sem átti enga möguleika aðra en semja uppá þessa afarkosti. Nú fer ég ekki fram á að við hættum þessari sér-íslensku leið af því að hún er í raun vond hugmynd. Heldur af því að hún er algerlega ótæk og ólíðandi fyrir þá sem vilja opnara og frjálsara efnahagsumhverfi. Lífeyrirsjóðirnir eru einfaldlega dragbíturinn á að verðtryggingar ákvæðin verði afnumin. Peningarnir bara rúlla inn og það er ekkert fyrir þessu haft. Það þarf ekki að kunna neitt til að fá fína ávöxtun á meðan laun rýrna og eignarhluti þinn í veðinu rýrnar. Tja nema þú seljir í uppsveiflu á fasteignamarkaði. En allir geta grætt á svoleiðis ef heppnin er með. Lífeyrissjóðir verða að taka sömu áhættu og aðrir á peningamarkaðinum. Það mun bara styrkja þá til lengdar. Nóg er af góðu fólki til að vinna í þeim geira núna.
Á meðan íslenska fjármálakerfið grefur sig niður í eigið sérviskulega neðanjarðarhagkerfi og notar það sem réttlætingu á því að almenningur fái ekki aðgang að frjálsu streymi fjármagns og lánakjörum í heiminum ætla ég að láta í mér heyra.